Auður Agla Óladóttir

Nú er sældarlíf hjá mér, við erum búin að koma okkur fyrir í nýju íbúðinni sem er alveg stórfín og risastór líka. Skólinn er búinn og ég er búin að skila öllum verkefnum. Svo er ég líka hætt að vinna í bili en í staðinn sit ég heima pg prjóna, hangi í tölvunni, stússast eitt og annað og sem mér dettur í hug.

Það er nú ennþá örugglega vika í að litla krílið láti sjá sig og kannski mun lengri tími! Ég nýti bara tímann til að sofa vel og oft og lengi og prjóna enn eina flíkina...

Kv. Auður Agla

Nú er mars að klárast og það er að koma vor þó að veturinn virðist aðeins ætla að setja svip sinn á umhverfið þessa dagana. Í gær fór ég í heilmikinn leiðangur með mömmu sem snerist bara um litla krílið sem er væntanlegt í heiminn innan nokkurra vikna! Nú er búið að fylla vesturbrúnina af ótrúlegustu hlutum svo þau gætu örugglega gerst dagforeldrar með allt þetta barnadót; vagn, kerra, bílstóll, vagga og ég veit ekki hvað og hvað. Það vantar voða lítið nema að flytja í nýja íbúð og vinna og klára námið :)

 Kv. Auður Agla

Það er fínt að hafa svona bloggsíðu sem fæstir vita af og enginn les :) Nú fer að styttast í vorið. Það er heldur betur farið að birta og það er komin svona vorlykt í loftið.

Það eru líka að koma páskar og á eftir páskunum ætlum við að flytja okkur um íbúð og svo að eignast 
barn í kjölfarið. Einhvers staðar þarna inn á milli vinnu og flutninga, þreytu og páskaeggja mun ég
finna mér smá tíma til að klára námið :) Koma tímar, koma ráð.

 Kv. Auður ólétta 

Skiptir samvinna / hópvinna máli? Hvenær og hvernig?

Í sögulegu tilliti hefur samvinna og hópvinna ekki notið mikilla vinsælda við kennslu í raungreinum og bæði verkleg kennsla sem og bókleg kennsla hafa að megninu til verið tileinkaðar einstaklingnum og hver nemandi hefur unnið sín verk í hljóði. Þetta hefur breyst á síðustu árum og notkun samvinnu og hópvinnu hefur aukist í skólastarfi. Það verður æ fleiri ljóst að samvinna og hópvinna skiptir máli í námi og ýmsar rannsóknir hafa sýnt fram á að það getur hreinlega skipt töluverðu máli eins og kemur fram í grein Joan Solomon; Group discussions in the classroom. Þar kemur einnig fram að þeir þættir sem samvinna og hópvinna nemenda hefur góð áhrif á eru til dæmis að nemendur viðra skoðanir sínar, geta séð fleiri lausnir á ákveðnum málum og atriðum eða sannfærast um að það sem þeir héldu er ekki heimskulegt. Oft virðast nemendur hafa þörf fyrir samþykki annnarra fyrir því sem þeir halda. Samtöl milli nemenda æfa þá í að koma skoðun sinni á framfæri og rökstyðja hana, tjá sig og hlusta á skoðanir annarra um leið.

Það eru til ýmsar leiðir til að gera hópvinnu árangursríkari. Góður kennari leiðir samræður á faglegar brautir og kemur í veg fyrir að nemendur bíði eftir “rétta” svarinu frá kennaranum heldur eru nemendur frjálsir í umræðu sinni og óþvingaðir. Það getur verið gagnlegt að láta nemendur ræða saman fyrir verklega æfingu, við hverju búast nemendur og af hverju? Það getur líka verið sniðugt að skapa umræður og / eða hópavinnu eftir lítinn eða stóran fyrirlestur hjá kennara og leyfa nemendum að vinna úr efninu, tengja það við ný atriði (hugsanlega í daglegu lífi) og dýpka skilning sinn á því sem kennarinn var að tala um í gegnum hópavinnu.

Það eru óendanlega margir möguleikar á samvinnu nemenda og hópvinnu og hópverkefnum. Möguleikarnir takmarkast einungis af hugmyndaflugi kennarans og hugsanlega peningalegu hliðinni í einhverjum tilfellum. Hvernig það á að útfæra hópvinnu fer algjörlega eftir efninu, áherslum og tíma. Í mínum huga getur hópvinna falist í allt frá 2-3 mínútna spjalli eða rökræðu milli tveggja sætafélaga upp í geysistór verkefni sem unnin eru í stórum hópum, bæði utan og innan skóla. Hvað upp úr því fæst veltur á gæðum verkefnisins og eftirfylgni kennarans, samvinnu nemenda og hvatningu.

Auður Agla kennslukona!

Gleðilegt ár og farsælt komandi ár! Hér kemur enn ein færslan um kennslu og efni tengdu því.